2022-08-23

مبارک مو سه! کندهار نن بیا د یوې ویاړلي ورځي شاهد وو؛

میرویس نیکه پوهنتون (۱۰۰) سل تنه ځوان ډاکټران او ډاکټراني ټولني ته وړاندي کړل!

نن پنج شنبه د اسد میاشتي پر ۲۷مه نېټه د میرویس نیکه لوړو زده کړو مؤسسې د معالجوي طب پوهنځی د يوولسمي دورې محصلینو فراغت غونډه ترسره سول.

په یاده غونډه کي د میرویس نیکه نيکه تعليمي او تحصيلي ګروپ عمومي رئیس ډاکټر نقیب الله افغان، د میرویس نیکه د روغتیایي علومو انستیتوت رئیس ډاکټر فاروق نعیمي، مؤسس ښاغلی بسم الله نظري، د پوهنتون علمي مرستیال، مالي او اداري مرستیال، د محصلانو چارو مرستیال، د پوهنځیو رئیسانو، اداري کارمندانو، استادانو، د ا.ا.ا استازو، د کندهار ولایت پلاوی، د ټولني روحانینو، علماء کرامو، د دولتي او خصوصي ادارو مسؤلینو، د فارغانو والدینو، میندو او خویندو ګډون کړی و.

د قرانکریم تر تلاوت کولو وروسته د یاد ګروپ عمومي رئیس ډاکټر نقیب الله افغان ټولو مېلمنو ته د ښه راغلاست تر څنګ مبارکي وویل، ښاغلي افغان وویل کلونه وړاندي مو اولادونه امانت په دې امید موږ ته را سپارلي وه، چي په لوړو زده کړو یې سمبال درته وسپارو نن الحمدالله هغه ورځ راغلې ده او د خپلو استادانو په زیار او هڅو ستاسو اولادونه په عالي تحصلاتو سمبال ټولني ته د ډاکټر په صفت د خدمت لپاره وړاندي کیږي.

د ډاکټر افغان په خبره چي د نورو امکاناتو تر څنک زموږ د معالجوي طب پوهنځی محصلینو ته د عملي زده کړي لپاره مجهز خصوصي روغتون چي محصلین په مسلکي ډول زده کړي پکښي کوي ځانګړی سوی دی.

ډاکټر صاحب افغان هیله وښودل چي کورنۍ دي په خپلو اولادونو لا هم نوري لوړي زده کړي وکړي.

وروپسې د اجنډا سره سم د پوهنتون علمي مرستیال ډاکټر نور د میرویس نیکه د لوړو زده کړو مؤسسې شالید ته کتنه وکړل او خپلي ټولي لاسته راوړني او خدمات یې مخاطبینو ته وړاندي کړل.

وروسته د ا.ا.ا د تحصيلاتو حوزوي کميسیون استازی ښاغلي سید سمیع الله قریشي خوښي څرګنده کړل ښاغلي قريشي د میرویس نیکه د لوړو زده کړو مؤسسې د رهبرۍ او استادانو څخه د زړه له تله مننه وکړل چي یو ستر خدمت ته یې مخه کړې ده او ځوان نسل روزي.

همدارنګه د معالجوي طب پوهنځی رئیس ډاکټر فضل الرحمن حاشر لخوا یادو فارغه کیدونکو ډاکټرانو ته د الله ج په نوم د خدمت کولو په موخه لوړه ورکول سول.

د محصلینو په استازولۍ هم وینا وسول چي د خپل تحصيلي مزل پر لوړو ژورو، خاطرو او زده کړو يې رڼا واچول، د استادانو څخه یې د زړه د تله مننه وکړل چي زحمت یې ورسره کښلی دی.

په پروګرام کي د ويسا اکاډمي زده کوونکو ترانې وویلې، تمثيلي پارچه وړاندي سول او د غونډي په وروستیو کي ټولو فارغ محصلانو ته د عربي ژبي د الفبا د تورو مطابق د فراغت تصدیق پاڼي ورکول سوې۔

د یادوني وړ ده چي میرویس نیکه لوړو زده کړو مؤسسې د ستاژ په برخه کي د هیواد په داخل او بهر کي هم محصلینو ته زمینه برابره کړې ده تر څو یاد ځوان ډاکټران وکولای سي چي خپله د ستاژ دوره بشپړ کړي.

مبارک مو سه! کندهار نن بیا د یوې ویاړلي ورځي شاهد وو؛



نور اړوند خبرونه
2023-Jan-29